फलटणचे 'सोशलनायक' प्रदिप मोरे यांना युनिव्हर्सिटी ऑफ लुयोसिना (UK) कडून सन्माननीय 'डॉक्टरेट' पदवी बहाल

आळंदी (पुणे): सामाजिक कार्य, संविधान जनजागृती आणि बहुजन चळवळीतील सक्रिय योगदानाची दखल घेत, फलटण येथील ख्यातनाम समाजसेवक आणि पत्रकार प्रदिप उर्फ प्रेम जयश्री सुरेश मोरे यांना 'युनिव्हर्सिटी ऑफ लुयोसिना (UK)' कडून सन्माननीय डॉक्टरेट' (Doctorate) पदवी देऊन गौरविण्यात आले. देवाची आळंदी येथील भव्य सोहळ्यात देश-विदेशातील मान्यवरांच्या उपस्थितीत हा सन्मान सोहळा पार पडला.

डॉ. प्रदिप मोरे हे सुरुवातीपासूनच महात्मा बुद्ध, छत्रपती शिवाजी महाराज, महात्मा फुले, शाहू महाराज, डॉ. बाबासाहेब आंबेडकर, अण्णाभाऊ साठे आणि क्रांतीज्योती सावित्रीबाई फुले अशा अनेक महामानवांच्या विचारांचे पाईक म्हणून ओळखले जातात. अत्यंत सामान्य परिस्थितीतून जिद्दीने पुढे येत त्यांनी शिक्षण, पत्रकारिता आणि सामाजिक कार्यात स्वतःचा ठसा उमटवला आहे. 

ही पदवी स्वीकारल्यानंतर आपली प्रतिक्रिया देताना डॉ. मोरे भावूक झाले. ते म्हणाले की, आज मी जे काही आहे, ते फक्त आणि फक्त विश्वरत्न डॉ. बाबासाहेब आंबेडकर यांच्यामुळेच आहे. हा सन्मान मी बाबासाहेबांच्या चरणी अर्पण करतो."* तसेच, हा प्रवास आई-वडील, पत्नी सुप्रिया मोरे आणि कुटुंबाच्या खंबीर पाठिंब्यामुळेच शक्य झाल्याचे त्यांनी नमूद केले.

प्रदिप मोरे हे बहुजन समाज पार्टीचे (BSP) निष्ठावान कार्यकर्ते असून, कोणत्याही पदाची किंवा तिकिटाची अपेक्षा न ठेवता 'एक नेता, एक पक्ष, एक झेंडा' या उक्तीप्रमाणे अहोरात्र कार्य करत आहेत. बाबासाहेबांनी दिलेल्या मताच्या अधिकाराचे महत्त्व पटवून देत, 'हत्ती' या चिन्हाचा प्रचार-प्रसार ते निस्वार्थपणे करत आहेत.

या सोहळ्याला युनिव्हर्सिटीच्या महाराष्ट्रातील ओनर डॉ. भारद्वाज मॅडम, अमेरिकन टिम, चित्रपट क्षेत्रातील कलाकार, राजकीय नेते आणि उद्योजक मोठ्या संख्येने उपस्थित होते. याच सोहळ्यात डॉ. मोरे यांचे जवळचे मित्र आणि कटगुण (सातारा) येथील सुपुत्र **डॉ. अधिकराव अवगडे (NDA ऑफिसर)** यांचाही गौरव करण्यात आला. डॉ. मोरे यांनी अवगडे यांची नुकतीच 'राष्ट्रीय मानवाधिकार महिला व बाल संरक्षण परिषद'च्या सातारा जिल्हाध्यक्षपदी निवड केली आहे.

डॉ. प्रदिप मोरे हे केवळ समाजसेवकच नव्हे, तर 'हिरानाना फाउंडेशन'च्या माध्यमातून सामाजिक कार्य, 'सोशलनायक न्यूज' व 'बोधीसत्व फलटण न्यूज'च्या माध्यमातून पत्रकारिता आणि संगणक परिचालक म्हणून शासकीय सेवा देत आहेत.

त्यांच्या या यशाबद्दल फलटणसह संपूर्ण पश्चिम महाराष्ट्रातून त्यांच्यावर अभिनंदनाचा वर्षाव होत आहे. "शिक्षण हे वाघिणीचे दूध आहे" हा मंत्र जपत इथून पुढेही शैक्षणिक पदव्या घेत राहण्याचा आणि संविधानाच्या रक्षणासाठी लढत राहण्याचा निर्धार त्यांनी यावेळी व्यक्त केला.