बारामती सत्र न्यायालयाचा दणका: अल्पवयीन मुलीवरील अत्याचारप्रकरणी बापाला जन्मठेप; पीडितेला ५ लाखांची भरपाई, सावत्र आई निर्दोष!

ॲड.अमोल सोनवणे यांच्या प्रभावी युक्तिवादांमुळे सहआरोपी सावत्र आईची निर्दोष मुक्तता!

बारामती | प्रतिनिधी

अल्पवयीन मुलीवर वारंवार लैंगिक अत्याचार करून तिला गर्भवती केल्याप्रकरणी बारामती येथील अतिरिक्त जिल्हा व सत्र न्यायालयाने पीडितेच्या वडिलांना जन्मठेपेची शिक्षा सुनावली आहे. तसेच पीडितेला पाच लाख रुपये नुकसानभरपाई देण्याचे आदेश दिले आहेत. याच प्रकरणातील सहआरोपी सावत्र आईची मात्र न्यायालयाने निर्दोष मुक्तता केली. एकाच खटल्यात मुख्य आरोपीला शिक्षा, तर सहआरोपीची निर्दोष मुक्तता झाल्याने या निकालाकडे लक्ष वेधले गेले आहे.

वीटभट्टीवरील वास्तव्यातील घटना

या प्रकरणातील मुख्य आरोपी हा पीडितेचा वडील आहे. सन २०२२ मध्ये तो पीडिता आणि तिच्या सावत्र आईसह वीटभट्टीवर कामासाठी आला होता. २७ डिसेंबर २०२२ पासून वडिलांनी अल्पवयीन मुलीवर वारंवार लैंगिक अत्याचार केल्याचा आणि याबाबत कोणाला सांगितल्यास जीवे मारण्याची धमकी दिल्याचा आरोप होता. पीडिता गर्भवती असल्याची माहिती समोर आल्यानंतर वीटभट्टी मालकाच्या पत्नीने तिच्या नातेवाईकांशी संपर्क साधून घटनेची माहिती दिली. त्यानंतर पीडितेला उपचारासाठी शासकीय रुग्णालयात दाखल करण्यात आले. या प्रकरणी दौंड पोलीस ठाण्यात गुन्हा दाखल करण्यात आला होता.

सावत्र आईवरही आरोप; न्यायालयात स्वतंत्र बचाव

तपासादरम्यान पीडितेने घडलेल्या प्रकाराची माहिती सावत्र आईला दिल्यानंतर तिनेही जीवे मारण्याची धमकी दिल्याचा आणि कथित गुन्ह्याला प्रोत्साहन दिल्याचा आरोप करण्यात आला होता. या आरोपांवरून पोलिसांनी सावत्र आईला अटक केली होती. तिला येरवडा मध्यवर्ती कारागृहात ठेवण्यात आले होते. तिच्याविरुद्धही दोषारोपपत्र दाखल करण्यात आले होते.

ॲड. अमोल सोनवणे यांचा युक्तिवाद; साक्षीदारांचा उलटतपास

आरोपी क्रमांक २ सावत्र आईच्या वतीने ॲड. अमोल सोनवणे यांनी न्यायालयात बचावाची बाजू मांडली. साक्षीदारांच्या उलटतपासणीदरम्यान प्रकरणातील महत्त्वाच्या बाबींची छाननी करण्यात आली. आरोपी क्रमांक २ हिच्यावरील आरोपांचे स्वरूप, तिची कथित भूमिका आणि तिच्याविरुद्ध उपलब्ध पुरावे यांचा स्वतंत्रपणे विचार व्हावा, यावर बचाव पक्षाने भर दिला.

एखाद्या व्यक्तीविरुद्ध गंभीर आरोप असले तरी तिची गुन्हेगारी जबाबदारी कायदेशीर पुराव्यांच्या आधारे सिद्ध होणे आवश्यक असते. या तत्त्वाच्या अनुषंगाने ॲड. सोनवणे यांनी लेखी व तोंडी युक्तिवाद केला. साक्षीदारांच्या साक्षींचे परीक्षण, उलटतपासणी आणि कायदेशीर मुद्द्यांची मांडणी यांच्या माध्यमातून आरोपी क्रमांक २ ची बाजू न्यायालयासमोर मांडण्यात आली.

खटल्यातील पुरावे आणि दोन्ही बाजूंचे म्हणणे विचारात घेतल्यानंतर न्यायालयाने सावत्र आईची निर्दोष मुक्तता केली. गंभीर गुन्ह्याच्या खटल्यात प्रत्येक आरोपीची भूमिका स्वतंत्रपणे तपासणे आणि त्याच्याविरुद्धचे आरोप पुराव्यांच्या आधारे सिद्ध होणे किती महत्त्वाचे आहे, हे या निकालातून अधोरेखित झाले.

वडिलांना जन्मठेप; पीडितेला पाच लाखांची नुकसानभरपाई

खटल्यात १२ साक्षीदार तपासले. खटल्यातील पुरावे आणि साक्षी विचारात घेऊन अतिरिक्त जिल्हा व सत्र न्यायाधीश एस. आर. पाटील यांनी मुख्य आरोपीला जन्मठेपेची शिक्षा सुनावली. तसेच पीडितेला पाच लाख रुपये नुकसानभरपाई देण्याचे आदेश दिले.

या खटल्यात ॲड. अमोल सोनवणे यांना सहकारी विधीज्ञ अविनाश जाधव, रितिक गायकवाड, राजरत्न ताकतोडे, वैभव झगडे, राहुल गिरमे, सागर खरात, ॲड. रवींद्र सोनवणे आणि लीगल एड पॅनेलचे ॲड. सुमित पाटील यांचे सहकार्य लाभले.