लोकशाहीर अण्णा भाऊ साठे राज्यस्तरीय पुरस्कार जाहीर; एनडीएमजेचे महासचिव वैभवजी गीते यांचा होणार ‘विशेष नागरी सन्मान’

उल्हासनगर (विशेष प्रतिनिधी):

महाराष्ट्राच्या सामाजिक व आंबेडकरी चळवळीत सातत्याने सक्रिय राहून वंचित व पीडितांच्या हक्कासाठी लढा देणारे, नॅशनल दलित मूव्हमेंट फॉर जस्टिस (एन.डी.एम.जे.) महाराष्ट्र राज्याचे महासचिव मा. वैभवजी तानाजी गीते यांना यंदाचा प्रतिष्ठित ‘विशेष नागरी सन्मान’ जाहीर झाला आहे. साहित्यसम्राट अण्णा भाऊ साठे आधार प्रतिष्ठानच्या वतीने आयोजित करण्यात येणाऱ्या ‘लोकशाहीर अण्णा भाऊ साठे सांस्कृतिक कला महोत्सव २०२६’ व राज्यस्तरीय पुरस्कार सोहळ्यात त्यांना हा गौरवशाली पुरस्कार प्रदान केला जाणार आहे.

८८९ वारसांना मिळवून दिली शासकीय नोकरी

मा. वैभवजी गीते यांनी गेली अनेक वर्षे आंबेडकरी चळवळीत कार्यरत राहत अनुसुचित जाती व जमातीमधील अन्याय आणि अत्याचारपीडितांच्या पुनर्वसनासाठी अभूतपूर्व लढा दिला आहे. पीडित कुटुंबांमधील तब्बल ८८९ वारसांना शासकीय नोकऱ्या मिळवून देण्यात त्यांनी अत्यंत महत्त्वाची व मोलाची भूमिका बजावली आहे. याशिवाय अनेक कुटुंबांचे कायदेशीर पुनर्वसन करत त्यांनी सामाजिक न्यायाचा दीप तेवत ठेवला आहे. त्यांच्या याच संविधानाप्रती असलेल्या निष्ठेचा आणि भिम सैनिकांच्या गौरवास्पद कार्याचा गौरव म्हणून त्यांना या महोत्सवात 'विशेष नागरी सन्मान' प्रदान केला जात आहे.

सोहळ्याचे आयोजन व मुख्य आकर्षण

हा दिमाखदार सोहळा रविवार, दिनांक २३ ऑगस्ट २०२६ रोजी सकाळी १० ते सायंकाळी ६ वाजेपर्यंत टाऊन हॉल, उल्हासनगर ३, जि. ठाणे येथे संपन्न होणार आहे. या महोत्सवात महाराष्ट्रातील विविध लोककलावंत आपल्या आकर्षक लोककलेचे सादरीकरण करणार आहेत. तसेच सामाजिक, सांस्कृतिक, साहित्य, क्रीडा, शैक्षणिक, कामगार आणि संविधान जागृती अभियानात भरीव कामगिरी करणाऱ्या राज्यातील निवडक मान्यवरांना राज्यस्तरीय पुरस्कारांनी सन्मानित केले जाणार आहे.

साहित्यसम्राट अण्णा भाऊ साठे आधार प्रतिष्ठानचे संस्थापक तथा अध्यक्ष श्री. प्रकाश सोमनाथ जाधव यांच्या मार्गदर्शनाखाली आणि पुरस्कार निवड समितीचे प्रमुख तथा प्रसिद्ध चित्रपट दिग्दर्शक-निर्माते श्री. विनोद भाऊसाहेब शिंदे यांच्या प्रमुख उपस्थितीत हा सोहळा पार पडणार आहे. या ऐतिहासिक आणि प्रेरणादायी सोहळ्यास मोठ्या संख्येने उपस्थित राहण्याचे आवाहन आयोजकांच्या वतीने करण्यात आले आहे.