सांगवी मोहित्तेवस्ती येथे विनापरवाना अवैध दारू विक्रीचा धंदा; प्रशासनाचे दुर्लक्ष? हातभट्टी बंद, पण देशी दारूची खुलेआम विक्री सुरू!

फलटण प्रतिनिधी : फलटण तालुक्यातील सांगवी येथील मोहित्तेवस्ती परिसरात विनापरवाना अवैध देशी दारू विक्रीचा व्यवसाय सुरू असल्याची चर्चा नागरिकांमध्ये रंगली आहे. हातभट्टी दारूवरील कारवाईनंतर आता काही ठिकाणी विनापरवाना देशी दारूची विक्री सुरू असल्याचा आरोप होत असून, संबंधित यंत्रणा याकडे दुर्लक्ष करत असल्याची भावना नागरिक व्यक्त करत आहेत.

स्थानिकांच्या म्हणण्यानुसार, मोहित्तेवस्ती परिसरात दिवस-रात्र अवैधरित्या दारूची विक्री सुरू असल्याने परिसरातील महिला, युवक आणि नागरिक त्रस्त झाले आहेत. या प्रकारामुळे सामाजिक वातावरण बिघडत असून, कायदा व सुव्यवस्थेचाही प्रश्न निर्माण होण्याची भीती व्यक्त केली जात आहे.

हातभट्टी दारूविरोधात प्रशासनाने यापूर्वी कठोर कारवाई केली होती. मात्र, त्यानंतर आता विनापरवाना देशी दारूची विक्री सुरू असल्याच्या तक्रारी समोर येत आहेत. त्यामुळे संबंधित विभागाने या प्रकरणाची तातडीने चौकशी करून दोषींवर कठोर कारवाई करावी, अशी मागणी ग्रामस्थांनी केली आहे.

दरम्यान, या प्रकरणाबाबत संबंधित प्रशासन किंवा उत्पादन शुल्क विभागाकडून अधिकृत भूमिका अद्याप समोर आलेली नाही. चौकशीनंतरच वस्तुस्थिती स्पष्ट होणार असून, प्रशासन या कथित अवैध व्यवसायावर कारवाई करणार का, याकडे परिसरातील नागरिकांचे लक्ष लागले आहे.