सांगवी गावात महावितरण ठेकेदाराकडून निकृष्ट दर्जाचे काम; 'NDMG' संघटनेचा आंदोलनाचा इशारा
वादळी पावसात दुर्घटना घडण्याची शक्यता
मिळालेल्या माहितीनुसार, सांगवी येथील राजेकुरण बंगला परिसरात काही दिवसांपूर्वीच नवीन विद्युत वाहिनी आणि पोल (विजेचे खांब) बसवण्याचे काम करण्यात आले होते. मात्र, हे काम पूर्ण होऊन काही दिवस उलटत नाही तोच, हे पोल आताच एका बाजूला वाकल्याचे दिसून येत आहे.
सध्या आगामी काळात येणारा वादळी आणि अवकाळी पाऊस पाहता, हे निकृष्ट दर्जाचे खांब कधीही कोसळण्याची दाट शक्यता निर्माण झाली आहे. यामुळे परिसरात मोठी दुर्घटना घडून जीवित किंवा वित्तहानी होण्याचा धोका निर्माण होणार असल्याचे चित्र झाले आहे. ठेकेदाराच्या अशा हलगर्जीपणामुळे स्थानिक नागरिकांमध्ये तीव्र संताप व्यक्त होत आहे.
या गंभीर प्रकाराची दखल घेत 'NDMG' संघटनेने महावितरण आणि प्रशासनाविरोधात आक्रमक भूमिका घेतली आहे. संबंधित दोषी ठेकेदाराची कसून चौकशी व्हावी आणि त्याच्यावर कडक कायदेशीर कारवाई करण्यात यावी, अशी मागणी संघटनेने केली आहे.
प्रशासनाने यावर तातडीने तोडगा न काढल्यास, एनडीएमजी संघटनेच्या वतीने लवकरच जिल्हाधिकारी कार्यालयासमोर तीव्र धरणे आंदोलन छेडण्यात येईल, असा इशारा संघटनेच्या पदाधिकाऱ्यांकडून देण्यात आला आहे. यामुळे आता महावितरण प्रशासन यावर काय पावले उचलते, याकडे संपूर्ण सांगवी ग्रामस्थांचे लक्ष लागले आहे.
Comments
Post a Comment